國家領導人果真唔係浪得虛名，想同佢做訪問原來要經過一番規定程序（咦，呢排乜都興「程序」？)，寧舍巴閉。
全國政協副主席霍英東噚日約咗香港三間「左報」同一批內地傳媒喺中銀大廈做訪問，講吓回歸五周年嘅感想，話題當然離唔開近來最熱門嘅高官問責制啦。好多傳媒包括八方嘅同事聞風而至，睇吓可唔可以有機會一齊做訪問。不過，八方嘅同事最後都被拒諸門外，因為霍老貴為國家領導人，所有傳媒要事先向中聯辦申請並得到批准先可以做訪問；而且入去霍老辦公室之前，重要先排隊逐一點名，唔使旨意可以冒認博懵。
八方聽講，有幾個行家噚日晨咁早打電話去中聯辦，想睇吓有冇辦法「補飛插隊」，結果全部打回頭。有同行重俾人窒番轉頭，話「平時叫你寫啲嘢，你又唔寫，𠵱家做訪問就想一叫就做，唔使旨意囉！」八方心想，嘩，使唔使咁講呀。
傳真︰2623-9278
電郵︰