近日蘇永康和安雅在台灣涉嫌服食搖頭丸被拘捕一事，令不少人覺得圈中人生活糜爛，撈家亦表示覺得香港風氣差。已育有一個兩歲半兒子的他，談到如何教育下一代時，卻只有歎氣的份兒。
「我平日開工太忙，冇時間教仔，呢樣係我嘅唯一嘅遺憾。但我個仔都習慣啦，佢知道爹哋一出門口，可能就會唔見兩個月，有時我返內地拍戲，打電話返屋企佢都唔聽，我心痛㗎，我明白佢會有啲嬲，不過我返香港之後，佢又成日捉住我去踢波，所以我好多謝我老婆，教仔嘅責任都要交晒畀佢。」
撈家又不諱言曾被朋友試探，看他有沒有一嘗食丸仔的興趣。
「以前有人同我講，話食呢隻丸仔好過癮，佢重話嗰隻丸唔係fing頭，但食半粒就會有從來未有嘅開心，結果呢個人俾我鬧到七彩。我同佢講，既然自己從來未試過咁開心，咁又做乜要去試到咁開心呢？我覺得呢樣嘢係觀點與角度，食毒品就點都唔啱㗎啦！𠵱家社會風氣非常唔好，藝人做嘅嘢係會對一啲青少年或者小朋友有影響，當然重要搞好社會教育嚟配合。」