王喜前晚去咗何文田一間酒吧，出席「關懷愛滋」宣傳活動，佢重即場教大家用安全套。王喜除咗用一個道具性器官示範戴套之外，佢重教埋人用完套後點樣處理。王喜話：「要將個安全套打個結，之後再用紙巾包住，拎去掉咗佢。」
王喜重講佢用安全套嘅經驗，佢話：「同大家講都唔覺得尷尬，因為呢件係好正經嘅事，我每次行房都一定用，我戴嘅速度重快過呢次示範。愛滋好易會奪去性命，真係唔可以貪一時之快，而且重要定期驗血，好過成班人出嚟玩，但突然驗到其中一個人有愛滋。」
此外，王喜都有留意前日世界盃英格蘭對巴西賽事，巴西打入四強。王喜大讚巴西球員朗拿甸奴，佢雖然俾球證趕出場，但都好有風度，王喜話：「佢冇發脾氣，重好有修養。」
郭富城（城城）同緋聞女友藤原紀香喺日本宣傳電影《雷霆戰警》，重俾日本傳媒踢爆佢哋密會。城城同紀香日前接受當地傳媒訪問時話：「緣份係天注定，我覺得另一半要有愛心同內在美。」日本記者話紀香都有呢個優點，紀香即刻臉紅，城城重話：「很好，很好。」紀香亦大方稱讚城城係個超水準嘅男士，城城即送上鮮花同新碟畀紀香。
王合喜噚日去咗長洲出席一個水上活動酒會，佢話自己成日都同謝霆鋒玩滑水、同陳小春玩風帆等水上活動，不過就唔係約埋一齊玩，問佢覺得邊個玩得叻啲？佢話：「大家鍾意嘅嘢都唔同，不過呢啲水上活動好有速度感，基本上係年輕人都會鍾意。」
另外，賴登勤為咗配合到台灣發展，專登改名為周羣達。
黃伊汶（Dior）噚日去尖沙嘴柏麗大道，為「海外學生仁濟夜」義賣獎券。
Dior講番以前喺溫哥華讀書時嘅難忘經歷，佢話當時住喺一家外國人嘅屋企，有一次佢冇返去兩日，咁啱又唔記得帶鎖匙，而屋主全家人咁啱去咗旅行，最後佢等咗成日先等到人開門畀佢。
有周刊報道指因為王菲縮沙，少咗號召力，令到原本開二十五場嘅《但願人長久鄧麗君》音樂劇，被迫減至十多場。監製徐正康即刻打電話畀馮仁昭投訴，重話會考慮發律師信告嗰本周刊，徐正康話：「嗰本周刊根本就唔專業，我哋喺上年已經聯絡王菲，但佢度唔到期，一早已經冇傾，點會因為佢而減場數。總之我哋暫定會開二十五場，唔會減場。」
中國跳水皇后伏明霞（小伏）好友、樂壇新人張鎧潼，噚日喺中環為一間健康食品店剪綵。
張鎧潼話：「我好彩食極都唔肥，平時我食好多餐㗎。」對於有傳其好友伏明霞今年九月會同財爺梁錦松結婚，張鎧潼話：「伏明霞𠵱家考試，我都冇搵佢。」
麥舜銘同陳復生兩夫婦噚日以嘉賓身份去尖沙嘴街坊福利會，做回歸活動嘅嘉賓。陳復生話遲啲會出書，將佢二十年前幫《大公報》寫嘅《我語您》專欄嘅內容結集成書，佢重話部份收益會捐去做慈善。噚日麥舜銘重好鬼馬，不時喺現場扮記者問陳復生問題，兩個一唱一和，認真合拍。
鄭裕玲（嘟嘟）噚日返電視城，幫《黃河》同《絲綢之路》兩個特輯做旁述。其間有工作人員想請嘟嘟玩佢前緋聞男友黃子華主持嘅《一觸即發》，挽救收視。因為世界盃賽事，令子華個節目收視跌破二十點，但嘟嘟就愛莫能助咁話：「點挽救呀，𠵱家講緊世界盃呀！」