入行十六年的羅嘉良，雖貴為無綫一哥，但竟然有十年時間要靠賒借度日，原因是當年月入不足二萬的他，為了撐場必須身光頸靚地示人，致多年來入不敷支，直至近兩、三年才算有真銀落袋。
羅嘉良（撈家）加入無綫十六年，由他擔任男主角的劇集，總數超過五十部，絕對稱得上是頭號多產小生，連撈家也形容自己是一部人肉拍劇機器。但不說不知，早於六年前憑《天地男兒》一劇走紅而穩坐無綫一哥寶座的撈家，原來一直是有名無利，十年來都要靠向家人借錢度日。
「𠵱家市道唔好，真正搵到錢嘅藝人唔係好多個，我搵錢係比好多人好，但我都係呢幾年先至搵多少少錢。以前我係靠借錢度日嘅，因為開支大，又叫做係主角，唔衰得俾人睇，嗰時《天地男兒》出咗街，我一個月重係搵緊萬零蚊，要出嚟見人嘅話，買套西裝都要幾千銀，你話死唔死吖？咁惟有問屋企人借錢，但我就唔會問朋友借。呢段借錢嘅日子持續十年以上，到我有錢時都要還錢㗎，係近呢兩、三年自己至叫賺到啲咋。」
其實不少藝人都曾慨歎娛樂圈這口飯，其實只得表面風光。
「係㗎，但冇法啦！做得呢行就好多嘢預咗，但又唔急得嘅，有啲嘢係你嘅就係你嘅，夾硬嚟都唔得㗎。」
一年前撈家續約無綫時，有傳遭多家公司挖角的他身價高達千萬元，但現今市道不景，雖則撈家坦承目前搵錢比預期中有差距，幸而他依然有錢賺。
「基本上我賺錢係一年多過一年嘅。今年我喺香港出街嘅劇比較少，好彩最近中央台播《創世紀》，國內識羅嘉良嘅人多咗，𠵱家我有好多廣告都傾緊，希望嚟緊嘅時間，自己可以
除了拍劇之外，撈家也想從商，數年前他曾與宣萱、楊千嬅及一位圈外朋友，合資開設果汁專門店「纖蜜汁」，可惜終因無暇打理業務而協議結束營業，但撈家對從商仍有很大興趣。
「『纖蜜汁』係有錢賺嘅，我做過呢盤生意之後，學到好多經驗，力不到不為財。我好鍾意食，第日我想開間雲吞麵舖或者魚蛋檔，火鍋店都有諗過㗎，有時我去幫襯九龍城嘅『輝哥火鍋』，都會同啲人傾吓偈，搜集定啲資料，到時我希望有時間親自打理間舖啦。」