鄭佩佩：
「上次金像獎時我同姜大偉、錢嘉樂同許鞍華去過探佢，我哋每一個人佢都認得。我最難忘係張徹搵我拍《金燕子》，但因為我之前套電影《大醉俠》入面嘅角色都係做金燕子，所以我覺得冇理由再拍《金》！我記得當時喺日本，佢同我喺街頭一路行一路傾，行咗成晚亦傾咗成晚，終於說服咗我，佢為人都好堅持㗎！」
張同祖：
「我覺得好可惜，係本港影壇嘅損失，因為張徹導演嘅創作唔止影響本港影壇，甚至連外國影圈都有深遠嘅影響，佢留低嘅創作，係畀我哋後輩去吸收佢對電影嘅智慧。」
狄龍太太陶敏明：
「狄龍𠵱家喺北京拍劇，今朝早張太已經打咗電話畀我哋，狄龍知道之後停咗一停，話要靜一靜，始終大家咁耐感情，佢梗係好唔捨得，內心好唔舒服啦。𠵱家出殯日期未定，我哋唔知趕唔趕到返嚟，如果真係唔得嘅話，我會搵個仔（譚俊彥）代表上香，我覺得最緊要有心。」
惠英紅：
「張徹係我嘅契爺，佢當年帶我入行。對於契爺離開，我個心都好唔舒服，記得以前試過拍戲，明明有一盞燈從高處跌落嚟，重咁啱喺佢身邊，契爺都可以處變不驚，佢當年引導我哋新人做戲，好有心機。我會聯絡佢太太，睇吓有乜嘢要幫手。」
羅文助手阿東：
「羅文知道張徹今朝逝世嘅消息之後，已經打過電話去慰問佢太太，籮記同張徹嘅太太好熟，同張徹反而冇咁熟，所以籮記第一時間打電話過去慰問，幫得到手嘅一定會幫。」
演藝人協會理事張權：
「我六十年代見過佢，邵氏之後就冇機會合作，直至最近金像獎頒獎畀佢，我哋先至見番面，發覺佢身體真係好差。佢係一位好出色嘅導演，如果有乜需要，我哋演藝人協會一定盡力幫忙。」
唐佳：
「以前佢做導演，我做武術指導，大家合作咗好耐，好似《金燕子》同《獨臂刀》咁，我哋都有一齊合作，佢離開梗係覺得可惜，但一個人年紀大咗，又有病，咁都冇辦法。」
劉德華：
「我今日（昨日）收到呢個消息，感到好難過，我初出道嘅時候，曾經同張徹合作過一部電影，佢對我嘅演藝事業影響好大，𠵱家電影圈損失咗呢一位前輩，係香港電影嘅損失。」