高官問責制出籠，大熱門局長人選唐英年自然冇甩拖。高官人選宣佈之前，與律師洪傾起買馬之事，由馬匹血統講到練馬師、騎師，最後講到投注額下跌，下季馬會啲高層究竟有乜橋呢？馬會八月尾開大會，到時啲董事、總裁會唔會向遴選會員（二百幾人）交代吓大計呢？
我哋都唔係遴選會員，冇資格講，但係馬會董事之中，有唐英年，律師洪醒起，「唐英年做咗問責局長，會唔會辭去馬會董事職位？」咦，係噃，馬會歷史上，好似未試過有在任局長（以前嘅司級官員）坐響董事會，即使夏鼎基咁巴閉，都唔係馬會董事。之不過，問責高官亦係香港歷史上第一次，馬會現任董事因其他身份地位被委任為問責局長，亦當然係第一次，冇案例、慣例可循噃。
任志剛係馬會董事，但金管局局長自認唔係公僕，地位與局長不同，算係例外。唐英年等問責局長算唔算係公僕？律師洪話：「唔算就於理不合，市民不服。」既然係咁，唐英年係唔係應該喺七月一號辭去馬會董事職位，以示將來無利益衝突呢？
諗諗吓，唐英年有心為港人服務，全力推動經濟發展，會好唔得閒，冇理由重走去馬會做義工，都係辭咗唔做董事好啲，董特首冇佢唔得，但馬會冇咗佢一樣掂，大把人肯做馬會董事，權衡之下，唐英年應為港人利益着想，為特首服務重要過為馬會貢獻。