朋友從網上下載，E來十個不睇世界盃的理由，全是美國佬自大自閉舊調，反駁都浪費口水。
我承認我的世界盃癡狂症嚴重，沒有賽事的日子，會翻尋味看重播，汁都撈埋。足球癡狂病患者，某方面天生異常。比如，隨時適應眼定定的環境，目空一切，只見波、不見棍。非球迷抱怨看九十分鐘直播要命，行開一陣，卻錯過全場唯一的入球。球迷基本功，就是要有死纏爛打的癮。日本出線贏俄羅斯那天的中場時段，估計東瀛舉國同時有880萬人爭住上廁所！更有能耐的球迷，連中場休息的廣告都不放過。假使現場睇波，中場還能見到你鍾意的後備落場熱身，試問點捨得起身，別說忍尿，眼也不會眨！
足球球例難倒很多盲毛，成為反睇波的最大理由。事實上球迷文化水平要求極低，文盲一樣能享受睇波樂趣，CEO跟扯皮條沒有誰比誰更有優勢。足球是簡單運動，比冰棍球、美式足球與棒球少約束，其實幾阿Q，相當適合腦袋開小差、懶懶閒的呆子。
我是呆子擁躉，大部份時間很低B，經常黐孖筋。所謂做慣球迷懶做官，世界盃癲狂病人永遠無可能做到部長。如果迫我向老董斟茶的話，肯定會突然從禁區頂入楔，成壺滾水插埋去！問責？整多碟滷水雞翼過你歎！爆眉角的右後衞包紮住上陣，掃把頭像打了包，成隻叉燒包咁。球賽連補時完場，雞聲一響，我拒絕交換球衣，對方的7號部長制服，睇多眼都會抽筋拗柴。