光化門附近間新世界百貨公司，為咗支持一班狂熱球迷，特登喺賽前兩個鐘免費派礦泉水，但因人數實在太多，所以幾萬支礦泉水一陣間就全部派清。
由於漢城市中心有封路措施，所以去光化門打氣嘅南韓球迷，唯一方法就係搭地鐵。但因「紅魔鬼」人數太多，地鐵公司為咗控制人數，特別實施間歇性唔准乘客喺光化門站上落，要去打氣嘅球迷，惟有在下一站落車。
韓商人睇準世盃熱，除了推出各種印有bethereds圖案嘅服式外，好多南韓女球迷最新打扮都會喺自己塊面、手、腳，印上南韓標誌嘅紋身貼紙，所以佢哋即時大量返貨，𠵱家南韓至少重有兩場波打，預計紋身貼紙會更熱賣。
南韓人對食物方面冇乜要求，佢哋為國家打氣十幾個鐘，最多人會買盒紫菜壽司頂肚，好似明洞一間壽司專門店，門口大排長龍，據老闆黃先生講，今日嘅生意係平時嘅五倍。所以話南韓踢出好成績，不但是國家榮譽，連普羅百姓也受惠。