近排可能個市實在太靜，新公司上市計劃都盡量押後，不過市場仍然不乏新推出嘅股仔，尤其係已經有風吹緊長科會喺7月中上市，好多藥業又或者以生物科技為名嘅公司都繼續佢哋嘅上市大計，就好似會喺今個月28日上市嘅長春達興藥業（8067）咁，就喺上個星期舉行推介會。有朋友去推介會睇過，發覺有啲料到，並唔係好似好多所謂生科股咁，剩係得個名。最好笑嘅重係佢哋老總喺個推介會度係咁HardSell佢哋啲藥，搞到成個成藥推售會咁。
呢隻股仔會全數用私人配售嘅方法推出，配售價得嗰四毫半，可以話係細細粒容易食。聽講隻股仔一早已經俾成班大戶圍晒飛，一啲股份都無流到出街，加埋隻股仔話到尾都係半隻生科股，所以有條件炒高。
呢一排個市唔聲唔聲跌咗落嚟，尤其係啲股仔，跌起上嚟都咪話唔得人驚，好似早前伏勝講過嗰隻一孖五咁，改名為御泰控股（155）後，走勢突然走晒樣，事關隻股仔玩合股兼削減股本。公司一公布呢個消息之後，即刻有傳聞話公司將會再批股，更有人傳話公司嘅大股東散貨走人㖭，結果喺大批沽盤湧現下，個價喺一個禮拜之內就唔見咗兩成有多。隻股仔個價雖然好肉酸，不過見到禮拜五開始有買盤入市，似乎係有有心人趁低買貨。
伏勝問過一啲前輩點睇呢隻股，都話其實唔係咁差，尤其係現價同每股資產淨值有五成六折讓，手頭又有三千幾萬現金，根本無乜集資壓力，再加埋隻股仔搞好咗重組後，市場上面嘅股數會少咗一大截，有利大戶推高股價，所以重叫伏勝睇實呢隻股㖭，話唔定可以慢慢炒番上十零個巴仙。不過話明係仙士股，買賣一定會有番咁上下風險。
伏勝