香港人多車多，周不時會發生輕微或嚴重嘅交通意外，導致人命或財物損失；雖然本港交通意外嘅死亡人數，係處於亞洲區嘅低水平，但各駕駛者仍有需要改善及培養良好嘅駕駛習慣。
據最近一項名為《埃索美孚香港駕駛者意見調查2002》嘅報告中指出，約7成嘅被訪者認為，轉線前唔打燈同跟車太貼，都係本港駕駛者最常見嘅不良駕駛習慣，而且重係引致交通意外嘅主要原因；除此之外，該報告又列出5項香港駕駛者最常犯嘅毛病，包括轉線時唔打燈、跟車太貼、超速、突然煞掣同衝紅燈等等。同時，交通意外嘅成因除上述各點外，駕車時唔用免提聽筒講電話、不留心路面情況及汽車音響聲浪過高等問題，亦係成因之一。
道路安全議會宣傳運動委員會主席余錦基先生表示，交通意外不但會引致人命或財物損失，甚至會使家庭嘅經濟受影響；故此該會花咗唔少心思及資源去推動道路安全訊息，並成功令交通意外死亡率大幅下降，可惜交通意外仍不時發生。所以在此奉勸大家，駕車時必須集中精神及遵守交通規則，以減低意外發生嘅機會。