巴西前日贏咗英格蘭後，班球員賽後話碧咸令佢哋留下深刻印象──不過唔係因為碧咸球技，而係佢嘅美貌。其中朗拿度最搞嘢，重讚碧咸嘅汗味夠香！唔通人靚仔連汗都香啲嘅？
話說哨牙仔賽後同碧咸識英雄重英雄交換波衫，事後朗拿度對記者講：「我同班隊友賽後一齊討論，大家都覺得碧咸真係好靚仔。」佢跟住話：「通常同人換完波衫，你都會預期聞到陣臭汗味，不過碧咸波衫嘅味唔同，好香呀！」
碧咸靚仔大家都知，不過講到體香，恐怕除咗佢個辣妹老婆之外，就唔會有太多人知，朗拿度今次真係有福囉。印象中無咩香水公司搵過碧咸拍廣告，唔知佢今次俾朗拿度讚一讚，會唔會得到廣告商垂青？係就要多謝哨牙仔囉。
睇埋噚日兩場八強賽事之後，「免費台」就會同「收費台」一齊直播餘下大戰，我求大俠就唔敢講邊個台好睇啲，邊個台嘅講波佬專業啲，但對想「波係唔使畀錢睇」嘅球迷嚟講，起碼唔使日曬雨淋企喺商場門口睇大電視，又或者畀百幾蚊入場費食餐飯咁破費啦。
我求大俠以前話過巴西人記仇，原來阿根廷人亦都差無幾；佢哋傳媒響巴西贏咗英格蘭後，唔理以前同巴西嘅積怨，大讚巴西佬好波，重乘機踩英格蘭，話佢哋人多欺人少都輸。鬼叫英格蘭今屆贏阿根廷，間接搞到佢哋出局之後，畀張英國小報整張設計圖片，叫啲阿根廷球員番歸咩。
南韓人認真識有風駛盡𢃇，話說最近有人將托迪同韋利個頭，移花接木搬落一套電影嘅海報上面，而內容大概係話兩條友開開心心執包袱返屋企，而韋利重話：「西班牙佬，一齊走啦。」結果一錘定音。