前晚喺浸會大學會堂舉行嘅「YES！全港校花校草選舉2002」，經過一輪激戰，新一屆校花同校草都正式誕生。校花係就讀佛教大光中學十六歲嘅沈慧珊，校草就係十八歲嘅柏雨中學學生何展基。佢哋兩個都係就讀中四嘅學生。
比賽當日，一班準校花準校草，着住自己學校嘅校服，參加多個唔同環節表演，八方見咁多靚仔靚女行來行去，睇到眼都唔眨入晒神。最精采嘅就係比賽學足電視綜合節目咁，其中一個環節要佢哋做天才表演。校花沈慧珊選擇跳中國舞，佢話：「跳舞係我嘅強項，我識跳好多唔同嘅舞，但中國舞比較好。」校草何展基身形高大，極有睇頭，所以就選擇行天橋表演，何仔重打開胸膛展示肌肉，佢好驕傲咁話：「呢身肌肉係我平時打波練番嚟嘅。」
校花同校草獲選後會得到二千大元現金獎、一部新款手提電話、六千蚊髮型屋禮券同一份三年嘅模特兒公司合約。
前晚選舉活動，大會重邀請咗歌手陳冠希、何韻詩同Shine做嘉賓。何韻詩同八方講：「我自問其貌不揚，所以細個都唔敢參加呢啲活動，怕俾人評頭品足。」
傳真︰2623-9278
電郵︰