撈家多年來在無綫均紀錄良好，身邊亦有許多朋友，可謂贏盡台前幕後的歡心。
「我唔覺喺呢行難搵真心朋友，唔知係我易信人抑或人哋易信我，我啲朋友個個都可以傾到心事。大家好坦白嘅，真正嘅朋友係好肯講嘢畀對方聽，就算有日你將我講嘅嘢講畀第二個人聽都唔緊要，因為我冇乜嘢唔見得人。」
眾所周知，撈家在娛樂圈的「爸爸」叫梁家樹（Tommy），是無綫戲劇組高層。
「有次我問Tommy，點解喺你面上睇唔到快樂嘅？佢話快樂未必要喺面上睇到，心入面快樂就得，呢樣嘢我要三年後至明白。以前我去party要盡興，玩到癲至叫快樂，但慢慢我知道原來同朋友傾吓偈都會好開心，Tommy講嘅嘢好有道理，佢將我嘅人生觀改變咗。」
「宣萱亦係我嘅好朋友，佢乜都笑一餐，又易同人相處，同佢做朋友會好舒服；艾威呢個朋友我亦都識咗好多年，佢係一個奇人，諗嘅嘢好新穎，但好穩陣。」
撈家跟古天樂（古仔）亦結緣多年，但每逢無綫舉行晒冷活動時，二人總難逃被拿來作比較的命運，但撈家自己卻從未有一山不能藏二虎的感覺。
「我唔會同任何人比較，喺我心目中，歐陽震華、林家棟同以前嘅陶大宇，個個都係龍精虎猛嘅老虎仔。」