外圍美日股市繼續跌，港股變咗「蛋散」，周四反彈81點後，噚日再跌過，恒指收10591，跌162點。
一周埋單，恒指跌364點，跌幅3.3%。恒指已經連續下跌5個禮拜，共跌1429點，累積跌幅11.9%。按多項技術指標超賣情況來看，恒指於10400-10600水平見底機會較大，對於手上冇貨嘅投資者而言，可能係一次入市良機。
當然，估底或估頂係極之難度高嘅動作，大戶亦經常設下陷阱於這些關鍵位中，擒殺散戶。例如5月9日恒指升至11962回頭，當日收11700，其後3日窄幅整固，5月15日再發力，抽上11838收市。以當時成交來看，買盤動力強勁，筆者亦相信恒指可升破萬二。但5月21日恒指卻高開低收，以雙頂回落，結束這次升浪，調整至今，跌幅逾1400點，但仍未確認見底。
因此，10400附近雖然估計可以守穩，但買第1注只宜輕手，預防睇錯市，最好就等候恒指下試10400不破，回頭向上升破10600時才買入恒指Call輪9045，買入後以10400作止蝕位，若反彈至10900受阻亦先沽出計數，破位則可考慮加注。另一方面，如果10400確認失守，則1萬點亦未必守得穩。
趙飛雲