陳敏之前晚同緋聞男友揚明齊齊蒲蘭桂坊，兩個人行到去CClub門口，一發現記者即刻彈開，保持距離。
後來陳敏之重此地無銀咁話：「我費事俾人話我同佢拍拖嘛，今日係應采兒生日，我哋嚟同佢慶祝切蛋糕！」但前晚一直未見應采兒出現，到陳敏之走時，佢就同黃泆潼一齊，揚明就同佢前後腳離開。
事後陳敏之接受訪問，講到佢近排被指撞邪入醫院，陳敏之話佢入醫院係因為血糖低，要去吊葡萄糖水。
不過陳敏之話細個嗰時的確撞過邪，近排重成日瞓瞓吓覺得俾人摸面同唔郁得，都幾恐怖。
另外，施念慈同老公陳鴻業前晚亦喺蘭桂坊出現，施念慈話同啲師妹敍舊。佢哋講開城中熱門話題世界盃，原來施念慈捧英格蘭，但係佢老公就捧巴西。
陳啟泰噚日為港台嘅教育節目《自在過一生》錄影，亞視最近有好多人事變動，好似張立話走就走，重話自己係擦鞋仔。問到陳啟泰喺亞視係咪要做擦鞋仔先企得穩？佢話：「梗係唔係，喺亞視做不知幾簡單，人少嘛！又可直接同啲監製或者高層傾偈，喺無綫實唔得啦！」
歐倩怡啱啱簽咗新經理人公司PollyStars，而經理人公司前日亦幫佢同無綫簽咗約，遲啲會開拍新電視劇。
不過，歐倩怡話唔想同男友郭晉安合作拍劇，因為唔想因為做嘢嘅摩擦而嗌交，又驚男友話佢做戲做得唔好，所以最好唔合作喎！
孫耀威最近喺新加坡同台灣新人、林心如師妹王宇婕拍緊台灣電影《二月十四》，孫耀威喺戲入面做王宇婕三個男友嘅其中一個，佢哋會有一場親吻戲，王宇婕嘅螢幕初吻就咁送咗畀孫耀威。王宇婕重話孫耀威個鼻太高，搞到佢好難錫。王宇婕重會喺戲入面有場激情自慰戲，演出都幾大膽㗎。
金城武𠵱家喺日本同黑木瞳拍緊套電視劇《黃金保齡球》，四月份佢抽空去咗台灣淡水拍亞細亞航空嘅廣告。拍攝嗰陣啱啱好撞正當地學生朝早返學時間，佢哋見到金城武，幾乎將成個淡水碼頭迫爆，而金城武喺混亂之中俾fans抽水，不過好在都只係俾人摸吓啫，冇任何意外發生。
張智霖𠵱家喺蘇州同孫興拍緊台灣電視劇《如來神掌》，雖然拍戲現場喺荒山野嶺，但為咗睇到世界盃足球賽，佢哋想盡辦法。孫興帶咗個有環迴立體聲嘅收音機，收聽球賽情況。張智霖就直情帶咗部無線液晶體電視機，聽到重睇埋。可惜，因為喺郊外收得差，世界盃開頭嗰幾日都睇唔到，後來佢掌握到部電視嘅操作，先可以一路拍戲一路睇波，而張智霖最支持嘅就係英格蘭。