李克勤為英格蘭咬損脷
宣萱：李華度好戲搶飯碗

昨日是世界盃八強半準決賽，由英格蘭大戰巴西，巴西以二比一踢英格蘭出局。英格蘭球迷宣萱、任達華和李克勤都垂頭喪氣，宣萱更說當世界盃「已經結束」；而巴西擁躉陳百祥、張達明和洪天明則很神氣，認定巴西必定捧盃。

宣萱：
英格蘭上半場打得好，但輸畀巴西都冇辦法，人哋始終技高一籌，巴西人個個由細踢到大，但英國要求學生讀書平衡發展，再講大家嘅背景都唔同。今日碧咸表現OK，但攻得唔夠，我𠵱家當世界盃完咗嘅啦，呢場就係決賽。李華度都幾好戲，隨時可以同我搶飯碗，而朗拿甸奴紅牌出場，係因為佢衰哨牙，推到人都冇歉意，棚哨牙望落笑騎騎咁。

李克勤：
我同朋友喺將軍澳個波竇一路食荔枝一路睇波，躁到一邊睇一邊咬脷，成條脷都損晒。英格蘭輸咗都冇辦法，𠵱家咪好咯，可以中立、客觀咁講波嘞，叠埋心水同無綫做主持，今次嘅賽果都反映到英格蘭嘅實力去到邊嘅。我俾阿叻（陳百祥）窒？佢捧嗰隊荷蘭夠三十二強都唔入咯！

任達華：
我好失望！英格蘭好似一潭死水，施文失波唔能夠原諒，場波非常之唔好睇，巴西驚輸，英格蘭冇衝力、冇鬥力！但巴西朗拿甸奴個紅牌唔應該畀，佢唔係有心，應該畀黃牌。既然賽果如此，我惟有捧塞內加爾囉！

張達明：
我預咗巴西入三粒，但入得兩粒，下半場個教練冇理由換朗拿度出場，分分鐘俾英格蘭迫和。以波論波，巴西始終球技好啲。但朗拿甸奴個紅牌唔應該畀，雖然我捧巴西，但李華度扮嘢詐死，我一路睇都有一路鬧佢！

陳百祥：
我好開心，但同時都替李克勤傷心。巴西係超班馬，今次發揮到團結精神，優勝劣敗好明顯。世界盃就好似世界大戰咁，巴勒斯坦唔應該打仗，應該以足球嚟分高下，邊個好波就邊個贏。

洪天明：
我捧巴西，支持碧咸。巴西今次贏咗，應該係冠軍嘞，之前巴西踢得唔認真，今次就真係顯示到佢哋嘅實力嘞！
採訪：楊潔雯、馮美茵
攝影：黃文成