世界盃決賽頻頻爆冷門，八強之中，令人最唔抵得嘅係美國。美國乜都是號稱世界第一，惟獨對足球冇興趣，亦冇美國人熱心睇電視直播世界盃，美國贏咗波亦唔會有人上街慶祝……萬一美國打入決賽？反高潮到極！
對酒吧業嚟講，英國先至係高潮所在。呢日碰到酒吧L，佢話六月份生意好到極，逢有賽事都爆棚，坐到滿瀉。價錢方面，中環收每杯飲品一百元，銅鑼灣價錢便宜啲，兩杯飲品收一百五十元。酒吧L話：「全靠裝咗大螢幕（一百吋），冇波睇就生意死晒！」
呢個六月會唔會賺大錢呀？酒吧L話：「一個月當三個月啦，七月肯定冇生意，啲鬼佬客嘅飲酒支出，六月份飲晒咯，七月份重唔乖乖地返晒屋企回氣咩，到時一定水靜河飛。」原來鬼佬客亦分幾種。據酒吧L嘅觀察，英國人最好，猛咁飲，睇完波繼續會逗留。法國人好慳，只飲一杯（其實係入場費），球賽完畢立即鬆人。南美人鍾意企喺外面睇，唔捨得入內，其他歐洲人亦比較孤寒，着到西裝立立靚，居然夠膽講價。
所以酒吧L話：「我唔得閒理邊隊贏，法國隊一早出局，我好高興，最緊要英格蘭一路贏，打入決賽，我就可以賣多幾杯酒！」今日已經知道英格蘭可唔可以過到巴西呢個難關，酒吧L就在商言商，希望六月三十日決賽係南韓對英格蘭。