旺角陳喺深水埗起家，初時做影音買賣交換生意，後來睇好日本水貨前景，把心一橫轉行賣日本水貨，食正幾個升浪，好快搵到第一桶金。今時今日，仍一個禮拜做足七日，屬典型香港搏殺一族。
聽佢講旺角零售最新行情，得益不少，因為佢守住旺角最前線，每日見盡唔少蠱惑嘢，《警訊》搵佢講香港最新騙案肯定有高收視。
旺角陳講起最近假卡黨竟殺入旺角，連細舖都唔放過。以前假卡黨只會買黃金首飾，貪其套現率高，可能𠵱家難落手，假卡黨轉而向潮流舖頭打主意，用假卡去買成萬蚊裏原宿名牌同特別版波鞋，轉頭五、六折賣畀人，輕易套現幾千。潮流貨比起黃金首飾易甩手，上網放又得、去商場炒舖放又得，唔使去當舖要被抄身份證有手尾跟。騙徒又捉到細舖頭心理，好難得有過萬蚊一張單做，心花怒放下點會得閒睇身份證？所以佢提醒生客無端端變大豪客，一口氣買幾萬蚊貨，收信用卡時要小心，原來CardCenter未必肯賠番畀舖頭，隨時屈番舖頭同假卡黨聯合行騙。
主持人：大食Jack
八卦熱報：