南韓對西班牙場波喺光州舉行，為咗疏導由漢城去光州嘅幾萬名南韓球迷，航空公司決定喺今日，由平時每日三班漢城往光州嘅航機，增加至十三班；但其餘嘅「紅魔鬼」球迷就要喺賽日晨早六點，搭五個鐘頭車趕去光州睇波。
由於南韓組委會規定八強戰南、西大戰門票一律要喺網上訂購，事件令到幾百位由十八日開始瞓街排隊買波飛嘅南韓球迷，白白浪費咗三晚時間，最後都係買唔到門票；佢哋為抗議組委會延遲公布購票情況，噚日喺光州世界盃運動場舉行示威抗議。
光州為咗迎接呢場南、西大戰，當地所有學校星期六都唔使上課，畀學生有更多時間準備睇波為國家隊打氣。另外，光州嘅百貨公司，預料全城球迷都會睇波，所以索性關門一天，畀員工返屋企睇波。
光州世盃場附近一戲院，為鼓勵國家隊擊敗西班牙入四強，喺比賽前三小時，免費請四千名球迷觀看三級片，實行為「紅魔鬼」球迷熱身。