高麗人杯葛意大利食品報復

高麗人民族性極強，今次安貞煥俾佩魯賈炒魷，就引發國民極大迴響；家陣當地好多青年更發起拒食意粉及意大利薄餅等食物，以示支持國家英雄，相信當地嘅意大利餐廳同快餐店有排苦惱。

激起反意情緒
話說意大利喺輸波賽話球證偏幫南韓，勝之不武，此舉更加激起一股反意大利嘅情緒，就連漢城最受年輕一代歡迎嘅食品Pizza同意粉，就已成為杯葛嘅對象嘞。
當地報章《Goodday》日前報道，香港有兩份報紙，喺南韓勝意大利後用「球證偏幫」為大題，搞到好多南韓人對香港都冇乜好感，小記採訪時都有啲顧忌。

「追星」行動陷瘋狂
其實，除咗大學生之外，當地嘅中學生對足球亦已陷入瘋狂程度，佢哋迷戀南韓國家隊球員比迷影視明星更狂熱；話說小記去採訪南韓國腳操練，喺球場外已經有接近二百多女中學生苦等，因訓練唔准球迷入場睇，但成班女生就喺場外大叫口號，打氣聲不斷傳入場內，嗌到個個身水身汗。小記對呢種瘋狂「追星」行動，如果唔係親眼得見，都唔敢相信。