問責局長名單事先張揚，但結果難產。有人話係中央卡住張名單，但名單得五個新人（舊人應該冇問題），其中李國章同唐英年家世顯赫，一定冇事，咁問題竟出在馬時亨定何志平定廖秀冬身上呢？真係要問廖暉至知；消息人士話，有人品格審查個「快勞」唔見咗喎。
言歸正傳，噚日寫完馬時亨一段姻緣，今日講講廖秀冬。佢係港大理學院畢業，除咗係蔡素玉師姐外，重同楊森一齊住過聖約翰宿舍，楊森住三樓，廖秀冬住六樓，重有一個「同居客」，就係住四樓嘅梁錦松。廖秀冬大學時，已經同佢前夫蕭炯柱拍拖，分手之後，則專心做生意。
八方查一查手上資料，發覺廖秀冬有份嘅有限公司有五家(見表)，其中一間係同行政會議成員錢果豐合夥做，偉易達系公司也曾是股東；偉易達老細，就係董建華器重之才俊黃子欣。呢位新貴，好長袖善舞呢。
傳真︰2623-9278
電郵︰