劉德華昨日由台灣返港，對於有傳華仔將簽約林建岳作經理人一事，華仔昨日承認曾與林建岳接洽，他說：「我嘅經理人約分三部份，電影、廣告同唱片，我同林生傾電影方面嘅合作，天幕冇繼續簽我電影方面嘅經理人約，我都要謀定後路㗎。」
而華仔的唱片則會交由一間名為加際娛樂有限公司（Catchy）負責製作，再由EMI發行。
對於被指反對天幕上市令中建方面有損失，華仔說：「如果天幕真係要上市或者值得上市，咁咪上囉，我會盡我所能配合公司嘅上市步伐。」提到中建有意出售天幕股份，華仔說：「麥生（麥紹棠）一直話係長線投資唔會賣㗎，我都幾訝異，我想買番啲股份。如果天幕件事搞到好大，我可能會放棄電影方面嘅投資，專心做藝人算啦。」
對於麥紹棠被指是虧蝕上市公司的厚薪高層之一，華仔說：「佢畀我嘅感覺係好鍾意搞電影，希望我今次冇選擇錯，我嘅工作唔會唔做，希望麥生會同我共度時艱啦。」
採訪、攝影：卓美娟