年輕人成為樓市生力軍，發展商應市場需求提供兩、三百呎嘅迷你單位，香港如此，北京發展商榮豐房地產比香港更加大膽和徹底，以創新、時尚及前衞作招徠，提供150方呎起嘅超級迷你單位，吸納一眾追求時尚的年輕買家。為咗貫徹其非凡特色，樓盤名稱亦特別有創意，叫「榮豐2008之非常男女公寓」，樓書更開宗名義話「我們在銷售一種生活方式」，對樓盤嘅具體資料如單位總數、樓高等反而隻字不提，真係非常特別。
呢個盤銷售成績都好理想，聽講第一期全部賣晒，其中有幾幢由大機構買入做員工宿舍，每幢逾千伙，幾千個單位話咁快賣晒。𠵱家推第二期約2000個單位，最平10萬蚊有交易，首期2.3萬，月供530元，啱晒單身年輕男女。
樓盤雖然冇嚟香港賣，但由於係外銷房，港人亦可購買，假如對個盤有興趣，可以瀏覽呢個網址：
蘭西地產代理近年搶攻內地市場，以特許經營模式運作嘅世紀21，響北京同上海落腳，而深圳同廣州嘅世紀21則響今年夏季開業。另外，世紀21最近攞到深圳集銀皮革綜合廣場代理權，個商場喺龍崗區，總樓面近65萬方呎，首期3座共700個舖位，面積約211至1604方呎，售價由14萬至123萬元，計劃7月底落成時推售，已聯絡內地銀行提供按揭。
另外，中原地產響內地10多個城市都有分行，老闆施永青相當睇好內地前景，原來最近佢哋重響本港電台贊助咗個節目，介紹內地有乜好地方，加深啲人對唔同城市嘅認識。
新地馬灣珀麗灣，係下半年重點樓盤，所以近排宣傳攻勢特別多，最新一期新地會會訊，就主力推介呢個盤，重特設珀麗灣網頁，網址係
地政總署副署長（測繪事務）陳克離任在即，退休前會放大假，各方好友自費同佢搞餞別宴，日前響港麗酒店擺咗近20圍，當晚重播番陳生嘅生活照同幾十年工作照片，中段突然加插世界盃賽事精采片段，令到大家精神為之一振，有入球之後，喝采聲重掩蓋過現場菲律賓樂隊嘅音樂聲。賽事完結後，司儀重叫在場人士要專心啲，認真識搞氣氛。
蘭西