聯通（762）壞消息接踵而來，國內手機傳減價40%，又話上海推出通話費變相減半優惠計劃，而且重傳聯通母公司會出售CDMA網絡畀中國電信或者網通，搞到聯通股價大幅下挫，低見6.10元。
繼高盛調低聯通投資評級後，聽講重有好多大行都會將聯通降級，可能令聯通有排跌。不過，據講有大戶喺6.10元水平收集聯通博反彈，不過大戶行為唔係一定啱，一旦連大戶都要認輸時，聯通可能跌得重恐怖。CDMA對聯通而言，可能係一個致命創傷。
不過阿虎最擔心係CDMA一旦為爭客而減收費，肯定會對中移動（941）構成壓力，先前投資者曾因電訊資費降價壓力放緩，增持過兩大國內電訊股，但今次可能要調轉頭減持，亦正好讓對沖基金借勢質低港股，然後吸納盈富基金（2800）平倉。
G.A.控股（8126）上市頭兩日成交好大，確實係威係勢，但股價抽高後卻一直回軟，噚日重跌破招股價0.50元，大跌17.85%，收0.46元，成交縮至248萬元。黑客話，此股要進入冷靜期，短期內將唔會有表現，買盤亦欠奉，直至大部份散戶肯認輸沽貨，及幕後收夠貨至有轉機。
華能（902）噚日因市場憧憬會有併購消息，逆市上升3.2%，收6.50元，成交有5300萬元。不過國內亦傳出減電費消息，華能旗下上海電廠可能因此而利潤減少1800萬元人民幣，據聞外資大行準備將華能盈利預測及投資評級調低，後市股價可能有壓力。
阿虎