好多人都鍾意鋤強扶弱，相信今日塞內加爾及南韓都會有唔少支持者。兩支球隊嘅半/全場盤路之前講過都屬「爛路」，再睇埋佢哋喺今屆賽事嘅表現，已足夠推敲出兩場波嘅半/全場盤。
睇番塞內加爾及南韓兩隊嘅半/全場盤路，都可見相當之「爛」，重未見有冧莊、連開兩口相同結果嘅情況，所以今場大可將兩隊上仗嘅半/全場結果先行剔除，才再落手揀盤。
塞內加爾喺之前四場賽事，有三場都能夠喺上半場取得入球，對手土耳其亦一樣，可見兩隊早段入球能力不俗，半場可以博和；論到後勁，土耳其就試過領先巴西及哥斯達黎加後，分別被對手反勝及扳平完場，而塞內加爾雖亦曾領先三球，但都畀烏拉圭追平；不過呢場係分組賽最後一場，當時或因出線在望而有未盡力之嫌，而且對丹麥及瑞典都係後上扳平及反勝，全場當取塞內加爾勝，今仗半/全場應取「和波/塞內加爾勝」。
南韓對西班牙就同樣敲半場和波，全場南韓贏。事關南韓一直以嚟嘅盤路雖然「爛」，但都有迹可尋，就係幾興「單跳」，由第二場（分組賽）到第四場（十六強）嘅半場盤，順序係「輸」、「和」、「輸」，呢場可以博佢哋半場又開「和波」；到下半場，再睇番佢哋由第一場到第四場嘅全場盤，順序係「贏」、「和」、「贏」、「和」，今場當然又係唔使諗，博佢哋可以食住贏意大利個勢，最後贏波啦！
文：華度