近排二三線股表現大多數唔掂，但仍然夾硬頂住股價者，多數必有所圖，好似就嚟改名上海世紀控股嘅四海互聯網（755），在股仔小股災一片風聲鶴唳中，股價仍然企硬35仙水平。
經紀陳話，隻股上個月以每股0.32元，配售3.5億股新股，集資1.12億元。話就話配售代理以盡力配售方式進行，但貨源大部份落在上海幫手上，由於市況唔好，散唔到貨，所以股價表現硬淨實在係意料中事。
若果係市旺之時，恐怕隻股一早已經炒到飛沙走石，𠵱家股價保持平穩兼有成交，已經好對得住捧場客。近排四海董事會出現人事變動，但經紀陳話只係公司其中一個股東嘅勢力轉移，冇咩值得奇怪。
另外，小初記得經紀陳話買第一電訊（8110）博反彈，於是八卦問佢沽咗未？點知經紀陳話重未沽，重話有信心配售股份被大莊消化後會再炒，小初真係服佢膽生毛。
慕容小初