每屆世界盃都有「扮嘢王」，而今屆非巴西球星李華度莫屬。佢噚日對英格蘭時又再扮受傷作痛苦狀，諗住博對方球員被罰出場，不過佢紀錄咁差，最終梗係唔得逞兼要死死氣爬番起身啦。
大家應該記得李華度點響分組賽對土耳其時，被人省中隻腳掩臉作痛苦狀，最後博得對方球員離場嘅事件。佢噚日重施故技，同英格蘭球員碰撞後倒地，攬住隻腳鬼咁痛苦；不過球證無理佢，而佢無耐即企番起身，證明根本無事。
當時巴西踢少件，李華度當然希望博到人哋都踢少件，自己隊波咪唔使踢得咁辛苦，我求大俠明白佢苦心，但以佢球王級身份，扮嘢就認真礙眼。
講番球證拉莫斯逐朗拿甸奴離場件事，似乎吹得過嚴。睇番慢鏡，朗拿甸奴係就係踩到人，但佢似存心攞波多啲。拉莫斯響分組賽烏拉圭對法國，已經趕過法國亨利出場，唔通趕人出場趕到上咗癮？
意大利對南韓賽後餘波未了，意大利國家電視台RAI準備控告國際足協，話佢哋球證犯錯太多累意大利隊出局，亦因為咁影響到佢嗰電視台收視率。另外，日前有四十萬個為意大利抱不平嘅電郵寄到國際足協。有口痕佬話，國際足協大佬白禮達前日突然為意大利隊抱不平，就係為咗平息眾怒喎，唔知真定假？
重有人講緊南韓球員對意大利時有唔少過勇動作，例如兜腳踢落馬甸尼個頭同鏟傷森保達，呢樣嘢看官自己判斷啦。不過有人報料話睇到南韓球迷響比賽期間用激光電筒射向托迪隻眼，搞到佢唔舒服。如果係真嘅話又似乎過份咗啲喎。
雖然係人都知世界一級方程式德國車手舒密加係足球迷，但點都估唔到佢會為咗睇波攞條命較飛。噚晚德國對美國正正係佢試車嘅時候，波就無得睇嘞，但佢要求車隊用對講機同佢即時報道賽果，揸緊車容咩易分心？真係諗起都危險。
每逢大賽好似總會有不愉快嘅事發生，好似土耳其響十六強打敗日本後，有土耳其小球迷學足入球功臣烏密特維拿，鏟咗個型頭；殊不知個細路嘅老竇唔滿意，迫個仔鏟光晒。個細路唔知係咪自尊受損，最後吊頸自盡。呢件事證明球星髮型對球迷真係有好大影響，但生命誠可貴，大家切勿輕生。