陳司翰的父親日前被雜誌揭發跟「友邦之花」拍拖，陳司翰表示一早已知父親覓得第二春，但跟父親的女友關係只是打招呼和講再見，甚至忘記對方的英文名。但陳司翰可以肯定的是，父親女友年齡不是報道指的二十八歲，應是細過陳慧琳。
陳司翰、何韻詩、鄧健泓和李彩樺（阿Rain）等，昨日在黃埔新城娛樂台，出席《仲夏日之旅》的宣傳活動。陳司翰的父親陳崇偉被雜誌報道跟年約二十八歲的「友邦之花」保險營業員拍拖，二人更不時在天水圍嘉湖山莊相聚。
陳司翰昨日表示知道父親有第二春，但他卻踢爆其父的女友年齡並不是二十八歲。陳司翰說：「據我知佢嘅年齡肯定細過Kelly（陳慧琳），佢係細過二十八歲，我都有見過佢，但唔記得佢個英文名。平時我同佢見到面都會打招呼，但關係只係『hiandbye』。」
問陳司翰可知其父經常跟女友在天水圍相聚，他說：「唔知，我同阿爸都冇乜嘢時間見面。我哋係一齊住，但如果阿爸閂埋房門，我就唔知佢係咪喺房裏邊，阿爸好少講自己嘅感情事。其實我哋同媽咪都一早知阿爸拍拖。」
那陳司翰可接受父親的新戀情，他又說：「冇話接唔接受，最緊要佢哋開心，事實都要接受。」
此外，日前有報道指阿Rain到緋聞男友林峯家過夜，她解釋：「當日我將我哋之前拍劇嘅相拎去佢屋企，我去嘅時間係晚上九點幾，我留咗個幾鐘就走啦，我都係第一次上佢屋企，當時冇見到林峯嘅父母，我同佢喺客廳聽歌。」
而何韻詩則表示一定要令她心動的人才是拍拖對象，至於緋聞男友劉浩龍，她說：「我哋只係識咗好耐嘅朋友。」
採訪、攝影：汪正文