今日係世界盃重頭戲巴西大戰英格蘭，好多球迷都千方百計去睇波，利記話部份後勤員工響噚日努力做定啲嘢，今日請半日假睇波，而公司董事總經理何紹章重話，有見於市況轉淡，一早已叫啲同事盡量清假，等7月再搏殺。有部份代理行老細重話同夥計一齊睇波。
為響應世界盃同深井傲庭峰開售，華懋集團大手筆送大禮（圖），除送世界盃紀念手表外，重用2萬蚊買咗一批金足球，同乒乓球一齊放響玻璃樽內，凡7月1日前參觀示範單位嘅人士，估中裏面有幾多個金足球，就可以攞一個。
另兩大代理行都有嘢送畀經該公司介紹參觀示範單位人士，美聯送「2002世界盃紀念足球」；中原就送小型座枱鐘。
恒基地產前晚賣大角嘴港灣豪庭二期，鴻運話有四成單位係佢哋做，攞到銷售金獎。另外中原港島東區住宅組連續5個月領先對手，上月佣金重創本年新高，所以老頂設宴慰勞做得出色嘅同事。
長實尖沙嘴港景峯全新現樓示範單位，下個禮拜畀預約人士參觀，下月初開放；鑑於7月1日回歸5周年，發展商計劃響現樓搞煙花欣賞派對。
明年創立一百周年嘅美國名牌電單車哈利大衞信，響香港物色多年嘅旗艦店終於有着落，透過萊坊國際，以月租5.5萬元，租用銅鑼灣興發街54號地下2500方呎舖位，而且重會繼續搵分店，店舖經紀又有生意啦。
發展商為咗推廣樓盤，好多時都會用奇招來吸引買家注意，恒基噚日響一份中文報紙登咗個廣告，促銷何文田京士柏山，特別之處係全部用英文，唔多唔少都會引起讀者好奇心留意一吓。
蘭西