鄭伊健同吳彥祖上星期三去咗馬來西亞一個小島，出席「豪華表」宣傳活動，伊健收到一隻價值七千三百元嘅潛水表，而吳彥祖亦收到一隻價值九千六百大元嘅手表做禮物。
伊健同吳彥祖重戴住隻表潛入水底，做幾個手表性能嘅測試。之前，佢兩個已經喺香港攞到初級潛水員牌，所以潛水係難唔到佢哋嘅，佢哋亦都隨身帶備一本潛水紀錄簿，將潛水時候嘅一切記錄低。不過講到最難忘，佢哋話係當潛到入深海時，見到虎頭鯊，好彩冇受襲擊。
吳彥祖話今次之行，係人生中一個難忘經驗，伊健就話下次有機會再去潛水，一定要帶衞星通訊設備，因為嗰度啲通訊設備好差。
有報道指蔡少芬同黎姿拍攝無綫新劇《黑夜彩虹》傳出不和，又妒忌黎姿啲戲服靚過佢，噚日蔡少芬喺電視城為《黑》劇開工時，好氣憤咁話：「報道對我好唔公平，我原諒個記者冇學識水平，我喺戲內演一個師奶，冇理由着晚裝，黎姿一向公認靚女，我亦有美貌與智慧，唔需要競爭。」
吳宇森下星期一會同尼古拉斯基治（NicolasCage）嚟香港宣傳新片《烈血追風》，佢哋會一日內完成記者會同首映。首映嗰晚會先喺尖沙嘴海運戲院舉行一個閱兵儀式，到時會有五十人扮士兵，而首映場地灣仔會展就會以世界大戰為布景，非常落本。
由馬偉豪執導嘅新片《這個夏天有異性》，電影公司噚晚用咗二萬二千多元喺銅鑼灣利舞臺包場，免費請睇戲，排第一位嘅係一個年輕人，佢話排隊同女友一齊睇。而馬偉豪就話：「我套《新紮師妹》續集都想搵Twins合作，但要睇時間配唔配合到。」
日本五人樂隊Lucifer噚日抵港，即時到新城電台舉行記者會，碰啱成員Yuki生日，新城亦送咗籠壽包畀佢，Yuki就用廣東話講：「多謝，好味。」獲公認為全隊最靚仔嘅主音Makoto，噚日最受傳媒歡迎，重做咗好多手勢畀大家影相，點知佢臨尾做咗個「反V」。
任賢齊噚日中午嚟香港，為今晚新城嘅「新城國語力頒獎禮2002」擔任頒獎嘉賓。噚日有兩位歌迷特登接小齊機，同埋送生日禮物畀佢，原來小齊後日（二十三日）三十六歲生日，佢話：「生日好好㗎，不過要插多支蠟燭就唔好囉。」小齊話佢生日要喺錄音室過，認真辛勞呀。