港股噚日早段跌破10600水平，其後回升，原來有投機者趁港府宣布新房屋部門架構前，入市炒地產股。
今次政府將3大房屋部門合併為1，將公營房屋包括兩鐵提供之建屋量集中處理，加大政府對房屋供應嘅控制力，給予市場一個強烈訊號，就係政府一定會托市，以免樓價下跌，令負資產情況惡化。不過地產股股價偏高，重係咪值得炒，實在令人懷疑。
聯通（762）CDMA5月份上客速度放緩，導致股價一度挫逾4％，收報6.55元，跌3％。公司唔肯面對現實，仍堅持到年底客戶可達400萬戶，但市場就睇唔到聯通有咩方法可以達到400萬客目標。若果聯通到咗年底真係實現唔到目標，將大大削弱芬佬對聯通管理層嘅信心，到時負面影響可能重大。
第一電訊（8110）原本諗住配售1.83億股，每股0.76元，集資1.38億元。不過，噚日出現多宗大手成交上板，合共2.05億股，即係話配售代理可能沽多咗2200萬股出街。
噚日股價大跌，一度下挫43％，低見0.50元。據聞配售代理喺低位已經入市補番倉，此股平均成價為0.64元，較配售價有0.12元差價，以2200萬股計，配售代理可以賺264萬元差價。第一電訊噚日總成交為2.51億股，扣除2.05億股上板，尚有4600萬股成交，相信配售代理已經補晒空倉，即係話後市已經冇補倉盤支持。
御泰國際（155）噚日一度挫33.33％，收報0.015元，成交869萬股，據聞話前主要股東出貨。
阿 虎