早排喺部長制大熱名單中赫然見到馬時亨榜上有名，令八方諗起啲陳年舊事。記得第一次見馬時亨時，佢係熊谷組MD，跟于鏡波搵食，熊谷組係本港數一數二建築商，亦有起樓賣；紅山半島個玫瑰園就係佢哋傑作。馬時亨做銀行出身，幫于老睇住盤數，後來于老成間公司賣畀光大，馬亦離開，並重返大通做私人銀行部門阿頭。當時梁錦松係大通香港區行長，兩個老同學一齊幫美國佬搵銀。
至於馬太，佢係王啟宇孫女。王家之香港紗廠，老香港冇邊個唔識。馬太叫Linda，芳名培琪，讀室內設計，一段情始於加拿大。話說有對港大夫婦移民多倫多，男嘅係馬時亨嘅老死，女就係王琣琪好友；馬當時在紐約打工，飛上加國探老友，王培琪亦身在多市，於是四人一齊食飯；呢餐飯，估唔到成就咗一段美滿姻緣。大家睇睇，後生時嘅王培琪係咪追死人呢！
傳真︰2623-9278
電郵︰