南韓同日本兩個國家一向都視對手為競爭對象，兩國合辦世界盃之後，雙方關係會否真係好轉就不得而知，但肯定嘅係南韓新一代接受日本文化。
由於日軍曾經入侵南韓，遺留很多慘無人道的血淚史，所以當地人以前對日本可謂視如敵人，單從每次南韓同日本國家隊喺球場上鬥個你死我活，就已經知道；而一切與日本有關東西，就更加都唔會獲得南韓人接受。不過，時代唔同，小記喺南韓接近一個月，到過唔同城市，每個區域都搵到日本文化痕迹，例如日本繙譯漫畫、電子遊戲機、J-Pop式音樂，甚至乎女性時裝，都離唔開日本文化影子，唔同嘅只係跟貼日本潮流步伐唔及香港人啫。
反而，南韓人喺食方面嘅文化，就保留傳統以辣為主，就算有日式食肆提供魚生壽司及烏冬麵等，不論新一代或者係舊一代嘅南韓人，都對此不大感興趣；始終南韓喺食方面，係一個無辣不歡嘅民族。