美股周三走勢如之前期指預示，杜指下跌1.5%，納指更大跌3%，但港股可能周三已大跌178點，加上淡友似有保留，恒指噚日早段稍為跌穿10600，低見10583即展開反彈，最後升81點，收10754。
恒指噚日跌至10583反彈，短期有機會挑戰5月延伸至今嘅下降軌阻力，約在10900附近。趙飛雲早市諗過買恒指Call輪9045博反彈，可惜有些少遲疑不決，午市已喪失先機，因此冇再追。
早前提過55至57元區域可以低吸新地（016），前日新地最低跌至56.25元，噚日開始反彈，大升2.25元，收58.75元。新地係趙飛雲嘅中線之選，主要睇好新地管理層及政府挽救樓市嘅決心。
目前雖然仍有好多人睇淡地產股，但趙飛雲覺得政府近年推出唔少措施，包括將房屋部門架構重組，目的都係改善供求失衡嘅現象，避免樓價再下跌，稍後可重踏升軌，估計經過未來兩三年調整後，樓市可重踏升軌，地產股中長線可睇好。
至於點解噚日唔買新地，主要覺得港股反彈後仍有下調空間，未到真正回升時，唔想一追入就坐艇。
趙飛雲