「英巴大戰」有幾矚目唔使多講，睇吓啲賭盤開到五花八門，就絕非一般球賽可比擬。而喺呢眾多盤口入面，又有邊啲係值得乘興玩下呢？ 文︰華度
呢兩瓣贏面永遠都係一半一半，不過簡單分析兩隊踢法，其實都有把握將贏面擴大。巴西隊普遍技術較佳，控球能力高，無咁易帶或踢咗個波出界；喺兩邊側擊或落底線攻擊方面，英格蘭球員就往往有敵衞看守之下仍然照樣傳中，出唔到都會想博個角球。所以呢兩瓣嘅最後結果，我就認為會係巴西隊先得到界外球，以及英格蘭先得到角球機會嘞。
哪隊先獲得界外球
英格蘭：1.83倍 巴西：1.83倍
哪隊先獲得角球
英格蘭：1.83倍 巴西：1.83倍
其實碧咸真係幾有大賽命，又可以話佢屢創奇迹，覺得今場佢真係可以喺以射罰球出名嘅巴西球員面前射入罰球，五倍分頭叫做抵玩。
李華度今屆係試過「詐死」（對土耳其一仗）而被國際足協罰款處分，不過平時佢喺比賽入面都好少「插水」博罰球，所以雖然有七倍，但又係唔值得玩。
睇番兩隊今屆比賽嘅角球得失數字，會發覺八球至十三球呢個範疇真係熱得有理，但仍然值得一敲，因為去到淘汰賽階段（十六強）嘅比賽，八場入面有六場都係開呢個範疇，今仗就算博晒「八至十球」及「十一至十三球」兩瓣，都有一點六倍分頭（三點二倍除二），回報同亞洲盤差唔多。
呢一樣我就認為係最好玩嘅一種賭盤，只要你估嗰個球員喺九十分鐘比賽入面有入波就當中，即係話鍾意大包圍嘅話，都唔怕中咗補唔番本，因為中完碧咸可以再中奧雲，再中埋朗拿度李華度都得。不過一個球員入兩球，都係當中一次㗎咋！
英格蘭
奧雲：2倍 碧咸：3倍 史高斯：3倍
巴西
朗拿度：1.8倍 李華度：2.2倍 朗拿甸奴：3倍
𠵱家碧咸大個仔啦，記得上一場出咗名惹火嘅米斯，喺又想「發作」嘅時候，碧咸就走埋去將佢㩒住喺地下，大將之風盡見，所以想睇到英格蘭球員不服球證判決而上前抗議嘅鏡頭都幾難，呢瓣唔使諗。
英格蘭球員：4.5倍
開始對「首個入球者」呢門玩意失咗啲興趣，因為以大包圍方法出擊，中咗都可能要蝕本，只揀一兩個又難中，熱門又太熱；真係要玩嘅話，只有「無入球者」一瓣最抵玩，就算開咗紀錄都重有「胡」叫（烏龍球唔計㗎！），等你全場個個攻勢都響度嗌「唔好入！唔好入！」就夠過癮啦！
英格蘭
奧雲：6倍 碧咸：9倍 史高斯：10倍 希斯基：11倍 杜利華冼佳亞：29倍 李奧費迪南：41倍
巴西
朗拿度：5倍 李華度：8倍 朗拿甸奴：10倍 祖連奴：17倍 卡洛斯：26倍 無入球者：8倍