第一電訊（8110）完成配股，噚日復牌大跌，最低見過50仙，收70仙，跌20.5％，兼跌穿批股價。
經紀陳話，佢見到隻股在低位之時，有關係密切嘅證券行收貨，所以佢跟埋一份，諗住博反彈。
第一電訊本來公布以先舊後新方式，配售1.83億股，每股作價76仙，集資額成1.38億元。不過，睇番噚日第一電訊有成2.05億股非自動對盤成交上板，即係配售代理行使咗隻「綠鞋」。
經紀陳話，由於集資規模唔算細，所以公司用兩個配售代理配股，據講一間就搵齊人坐貨，另一間就出街搵人要貨，所以搞到噚日股價表現咁差。
以噚日成交股數2.51億股計數，減咗非自動對盤上板嘅2.05億股，即係街外要咗貨嘅人，已經投降沽晒出嚟，所以佢先至夠膽撲入去。
希望經紀陳今次好彩，最怕係人哋係托住個價沽貨。
慕容小初