潮流興纖體，女士尤以瘦身為美。某日左丁山有緣碰到一啲歌星，只見Twins兩位少女好瘦，陳文媛亦似乎瘦過籠，不過何謂美麗，各花入各眼，唐朝女人以肥為美，一定唔合今日嘅選美標準。
去年在CNN時裝新聞片見到時裝設計大師KarlLagerfeld（列格菲）嘅面貌，肥佬一名，睇個樣就似足肚滿腸肥，賺到笑咁款。但上星期六睇LarryKingLive，訪問列格菲，嘩，乜瘦咗咁多，似足藝術家喎。原來拉利京專係問佢何解幾個月下來可以減肥九十磅？
列格菲話某日照鏡，覺得自己過肥，心血來潮去搵醫生開食療方，以無比決心，戒掉肉食，每日只食蔬菜、酸乳酪、CornBread。唔食減肥丸、唔食任何藥物。
起初覺得好悶，好彩佢平時完全唔吸煙、唔飲酒，雖然住在巴黎而唔喜歡法國菜，只去日本料理、意大利餐館，飲食比較平淡，所以改食減肥餐之後，比較容易適應。
此外，列格菲限定每晚睡眠七小時，每星期聘請私人老師教跳社交舞，當作運動，最鍾意跳ChaCha、Bolero。
列格菲好似已經六十幾七十歲，減肥之後，好靚佬喎，啲成功人士之所以成功，就係做事有決心、有恒心，話咗減肥就減肥，唔到你唔服。
左丁山經常話畀自己聽，減肥二十磅，講咗三年，尚未成功，唔怪得自己做事亦唔多見成績。