佩魯賈響南韓打敗意大利後，即刻炒咗安貞煥，引起軒然大波。亞洲足協嘅韋立本反應最激，呼籲亞洲各國唔好再畀球員加盟佩魯賈，反而國際足協就唔干預。重唔止咁，國際足協阿頭白禮達再惹事端，話球證響場波真係犯錯，響呢個風頭火勢撥晒火。
安貞煥被炒，唔少人都鬧意大利佬輸波無品兼種族歧視。我求大俠覺得呢件事某程度上牽涉到公平競技問題，國際足協唔應該話「球會事我哋唔理」，而應該搵人出嚟評下理。
白禮達無提到安貞煥不特止，只係話場波湯馬斯嘅入球作廢，同埋托迪被罰第二面黃牌都好無辜，咁講法盞搞到意大利佬嘈得大聲啲！
講番佩魯賈，我求大俠覺得如果當年唔係中田英壽，即係亞洲人幫佢哋省靚招牌，鬼有咁多人識得佢哋隊波咩？點計佩魯賈都唔啱。
意大利輸畀南韓，意大利職球員同球迷都認為係球證摩蘭奴玩針對，賽後已經有球迷叫佢去死。最新有傳意大利黑手黨因為意大利隊輸波而損失幾千萬美元，正計劃搵人買兇殺摩蘭奴，都咪話唔恐怖。
係人都知球王比利出名畀山埃貼士，好似佢賽前貼嘅熱門法國、意大利同阿根廷全部早唞，佢睇死嘅巴西就好掂。不過球王就死撐，話其實佢意思係如果巴西克服唔到一啲問題就唔掂，克服到嘅話好似𠵱家咁，掂晒。真係咩都佢講晒囉。
早排國內《體育周報》咪傳過中國球員涉嫌賭波嘅，噚日份報紙終於發表聲明，話消息來源不實，重肯公開道歉，總算還中國球員一個清白。大家都好關心中國隊，但造新聞真係唔啱。
有關世界盃網上投票嘅結果，通常無咩參考價值。好似CNN投票就睇好美國喺四支八強冷門球隊中，較有機會贏世界盃嘅一隊；而英國網Sportinglife投票結果係逾六成人睇好英格蘭贏巴西。相信上呢啲網投票嘅人以自己國家最多，當然投自己球隊一票啦。
英巴大戰，據報稱巴西今場波會着藍色作客戰衣比賽。你可能會問點解我哋體育版重猛咁落巴西黃衫相？無計啦，巴西今屆未着過藍衫，畀你都想睇啲又新又夠氣勢嘅黃衫相，好過睇咸豐年嘅藍衫舊相啦。