六十六歲的何鑑江，仍然中氣十足。正如他的徒弟李德能所講的，這種聲線是上天賜給他的，其他人恨也恨不到。
問他為何「收山」多年，突然在九龍灣展貿的有線世界盃嘉年華重操故業（足球評述員），還與一班後生的球評家一樣gel晒頭、畫晒花臉。他想也不想，大大聲兼理直氣壯的說：「我再出番嚟，唔係為興趣，最緊要係錢，重要話畀人聽我未死，重喺度。」
訪問時是何鑑江（叫他做何老鑑或KK，他會更高興）剛好講完中國隊最後一場分組賽敗給土耳其那一場波，在不足二十四小時後，他又會再隻身返回上海。還未落妝的他看來一點也不像六十六歲，中氣十足之餘，說起話來會不期然手舞足蹈，他手上的打氣棒差不多未得閒過。說回那一臉打扮，何老鑑自噓的說：「真係千年道行一朝喪，從未試過化到咁得人驚，個頭又punk，不過受人二分四，佢地鍾意點就點。」
今次何老鑑重執咪高峯講波，其實只是客串性質，主要講他最拿手的中國隊三場波。他說：「如果唔係講中國隊，我都唔會接嚟做。放抵咁耐（講波），表達時會有問題。中國隊話晒都熟啲，話晒跟咗佢地八年多，由中國足協甲A第一場波開始到現在，講佢地會易講啲。」
「其實我正式出鏡講世界盃由七八年（西德主辦國）那一屆開始，一直講到九○年那一屆。」
未出鏡講波前，何老鑑在港台講波的年資足足有二十年，直至九一年退休。能夠喺講波界屹立四十年；何老鑑話自己夠膽去鬧人、夠坦白同夠親切感。
是呀，那天在有線同台講波的新一代球評家，個個都比他至少年輕二十幾三十年；問他以甚麼取勝，他說：「我唔係叻過佢地，有好多嘢我都唔掂，我唯一係靠經驗去睇場波嘅形勢，分析一下。𠵱家佢哋好多資料，連球員阿媽有幾多條毛都講埋，我邊有呢啲料呀；我係賣現場嘅，叫做睇場波睇得通透啲。同佢哋有啲唔同。」
人活到六十六，在上海有份正職，有兩個兒子，還求甚麼呢？他說：「𠵱家係有得做就做，有得食就食，有女友就去追。」也許他就欠一個老伴吧！
自何鑑江退休後，兩兄弟絕少合作講波，不過，何老鑑剛應承幫港台直播世界盃準決賽同決賽三場波，到時球迷只要打開收音機就可聽到「老鑑」同「老靜」一齊講波，懷緬一番。
曾經在訪問中問何老鑑有關細佬何老靜的點點滴滴，但估不到他沒有像講波一樣「敢作敢為」，總是支吾以對的說：「我唔知佢鍾唔鍾意我講佢，不如你問佢啦。」
何老鑑對「退休」的睇法如下：「你退休坐喺度，講得賤啲，即係等死。早上食完早餐，出街行吓，然後返屋企食晚飯，跟住瞓覺，有甚麼樂趣。睇見嗰啲去公園散步、捉棋嘅老坑，都唔知佢地為乜，我覺得佢地好悲，完全唔羨慕。」
文：徐嘉華、曾雁平
圖：李家皓、梁祖彝