八方早前講過廣東社團聯會慶回歸大搞活動，連「回歸盃」龍舟賽嘅噱頭都諗到。噚日聯會一班大佬喺灣仔「新王朝觀景酒家」介紹活動詳情，八方上到去合和中心六十樓，先知呢間新王朝前身就係四月倒閉嘅北狩酒家，現時由廣東社團聯會顧問、新光常務董事總經理李國雄接手，以十九萬月租，投資總共七百萬左右，比新開一間平一半。
李國雄睇嚟專長淡市出擊，佢原來對北角敦煌酒樓個靚位都有興趣，不過李國雄同業主都有意分開租，二樓可能做商舖，李生只想要三樓一層，租金最緊要平，皆因大型酒樓風險太大，單係租金已經過百萬。北角敦煌好在一層擺到過百圍，最啱接大酒席，以李生同親中社團嘅關係，年中做國慶、回歸晚宴都夠和味。佢重好有創意，好似呢間新王朝，幫襯二十圍就送直升機香港觀光，條路線重係心形，啱晒新婚夫婦，服未！
（圖）廣東社團聯會一班大佬，左起：余國春、沈廣河、歐陽成潮、殷國榮及新王朝老闆李國雄，介紹慶祝回歸活動。
傳真︰2623-9278
電郵︰