日一蘋果，醫生遠離我。」蘋果四季都幾乎食到，品種更遍及世界各地，有五顏六色品種任揀。以下就等小記同大家逐一介紹，唔同嘅蘋果重可以煮出不同嘅中西菜式，令菜式增添一份鮮甜及清爽，有興趣亦可以跟住做。亦以這些健康蘋果菜式恭賀蘋果日報七歲生日快樂，繼續與讀者健康地成長。
記者及示範：陳冰麗
攝影：陳穎
將攪碎嘅蘋果拌以茄汁、檸檬汁做成一個酸甜蘋果醬汁，用作蘸任何肉類都咁惹味，配以呢個蘋果醬汁，更有助減低食肉嘅肥膩感。
材料：
王林蘋果1/2個
姬娜蘋果1/2個
豬扒2-4件
檸檬汁適量
茄汁
麵粉少許
蛋1隻
調味料：
鹽1/2茶匙
糖1/4茶匙
紹酒少許
生粉1/2茶匙
做法：
1﹒豬扒洗淨，以刀背略拍，再加入調味料醃約20分鐘。
2﹒雞蛋拂勻，豬扒先蘸上適量蛋汁，再蘸上適量麵粉，放入油內炸至金黃熟透，取出瀝乾油。
3﹒蘋果㓟去皮，去芯後放攪拌機內攪成茸，倒入鑊內與檸檬汁及茄汁拌勻煮成醬汁，拌以豬扒同食。
小貼士：
1﹒揀蘋果以色澤光亮、聞落帶香味、果實堅挺、有果柄嘅為佳，食落必爽脆。
2﹒蘋果以爽脆最好食，放耐咗會帶粉，入口軟綿兼且會較乾身及無乜味。
3﹒㓟咗皮嘅蘋果好快會變鐵銹色，如非即刻食可將其浸喺淡鹽水內，以保存營養無咁易流失。
以蘋果片夾雜魚柳及火腿扒同食，感覺好清新。蘋果汁嘅酸甜更有助辟除魚柳嘅腥味，而火腿扒嘅鹹香味又能點綴魚柳嘅淡口味，令鮮味更突出，三者互相配合。
材料：
急凍龍脷魚柳2條
陸奧蘋果1個
火腿扒1/2件
洋葱1/4個
調味料：
鹽1/2茶匙
糖1/4茶匙
黑椒粉少許
做法：
1﹒將魚柳洗淨，切件，喺魚肉上斜切一刀，但切勿將魚肉切斷，加調味料略醃。
2﹒蘋果洗淨後去芯，一半切片，另一半連同洋葱攪碎；火腿扒切薄片。
3﹒取一件魚柳，夾入蘋果片及火腿扒各一件。
4﹒預熱焗爐，以180度焗約5-10分鐘即可。將蘋果茸及洋葱煮滾，加少許鹽調味，淋上魚面同食。
炎炎夏日食少少辣有利食慾，呢款加入咗蘋果及辣椒一齊煮成嘅酸辣湯，好啱家陣飲用，湯酸辣之餘又帶清香味，再配以五顏六色雜豆，賣相亦相當吸引，必能誘發食慾。
材料：
青蘋果、華盛頓蘋果各1個
豬肉或雞肉6両
辣椒粒1隻
雜豆3湯匙
豆腐1件
調味料：
鹽1/2茶匙
糖1/4茶匙
胡椒粉、麻油各適量
豆瓣醬1湯匙
做法：
1﹒青、紅蘋果分別洗凈，然後切粒備用。豆腐洗淨，切丁。
2﹒豬肉或雞肉洗淨，切粒，加適鹽、糖、胡椒粉、油少許略醃。
3﹒煲滾適量水，先加入豬肉粒或雞肉粒、蘋果粒及辣椒粒煲約10分鐘，然後加入豆腐、雜豆再煲至滾，加入調味料，最後以生粉水打芡即可以趁熱飲用。