香港交易所慶祝成立兩周年，今晚在萬豪酒店設下盛大酒會，重請到財爺梁錦松主禮；八方亦收到帖，本來好想過海見吓班經紀老友，捧下鄺其志場，但今日真係要留喺公司。
因為今日係《蘋果》七周年報慶，雖然公司好低調冇乜活動，但一班老同事就私下約好食餐飯，所以八方決定為私忘公。
七年，二千五百五十多日，睇番轉頭就好似前幾日咁，八方記得創刊號頭版做十個特首熱門人選故仔，當時班同事來自五湖四海，大家未夾慣，好立亂，但好有衝勁。肥佬黎就日日鬧，日日改。
眨下眼，香港已經改朝換代，董建華已經第二任，《蘋果》已經準備好再創刊——在台灣出一份日報。堅哥近排成日台港兩邊飛，就係忙於埋班；八方昨日在寫字樓見到佢，佢笑口噬噬，一啲都唔躁，睇嚟好享受開山劈石由冇到有嘅創刊生活，於是問佢七周年有乜嘢益員工，堅哥答得好爽：「一人一隻表啦。咁讀者呢？一人一個杯墊囉。」
新聞貴在新，做新聞工作，最緊要快；因為咁，我哋要成日睇表；至於讀者，成日睇報紙就最好啦。
傳真︰2623-9278
電郵︰