六月九日本欄提過一位讀者寄來三頁「阿樂抗癌藥方」（即以前阿樂在本版專欄嘅影印本），即刻引起注意，一位報界朋友因親戚患癌，立即走嚟索取，跟住一位讀者Catherine來電郵又話要。因收到嘅影印本排得好密，不宜傳真，亦冇法子電郵，中間唔知會唔會引起版權問題（好彩堅哥以前話過《蘋果》歡迎影印），點樣辦？
每次一講親癌症，必有讀者回響，可知人人談癌色變。又難怪嘅，最近飯局之中，已聽到兩位老友嘅阿媽、一位老友嘅太太患上癌症，令左丁山好唔舒服。呢味嘢唔知點解咁普遍，同我哋嘅緊張生活、壓力有冇關係呢？癌症難醫，兼且醫療費用昂貴，令人難以抉擇。一位朋友嘅朋友在美國患上末期癌症，醫生話如果做手術可以延命一至兩年，病者計完又計，發覺會耗盡儲蓄、醫療保險都唔夠用，就算得番兩年命，兩個仔可能冇錢上一流大學，以後一家人攬住喊，於是佢決定聽天由命，六個月後過身，留下壽險及儲蓄畀老婆，兩個仔過「中產階級生活」。呢個關乎經濟學上嘅「選擇」（choice）概念，可以令一家人痛苦無比。
每一諗起十二年前賓架黃患上胰臟癌，發現後三個月內逝世，因銀行保險過期，佢又因辭咗職未來得及再投保之往事，即刻心痛。癌症之為禍，談之色變。