今次小初又再次領略到「成也風雲，敗也風雲」嘅道理，二三線股仔連續多日跌到四腳朝天，連帶部份據說有基金睇好嘅股仔，一樣跌到阿媽都唔認得。
好似高寶綠色（274），早兩個月因為公司打算進軍大陸市場，股價就由唔夠1.80元，一路炒到上去最高2.50元樓上，當時適逢外資大行睇好進軍大陸市場嘅工業股，高寶綠色因此獲得唔少芬佬捧場。
風光過後，近排市況不濟，芬佬一話唔玩就唔玩，噚日高寶綠色股價急跌15.9％，收1.85元，成交金額有成4760萬元。
經紀黃話，唔少貨係由早前追入嘅芬佬沽出，佢哋話唔玩就即刻唔玩，唔會好似莊家托住股價慢慢沽，所以先至引起股價急挫。
佢又話，早在4月初，高寶綠色發行過一批千幾萬元嘅可換股債券，換股價成2.1623元，據講債券已經全部兌現沽出，所以有人毋須繼續托價。
慕容小初