前晚的世界盃，南韓爆冷以二比一擊敗意大利，身為半個南韓人的洪天明當然十分開心，但原來當晚他要開工，沒有看直播。黃家諾則在蘭桂坊和一眾南韓人歡呼慶祝。
前晚世界盃南韓對意大利的賽事，意大利雖然先開紀錄，但在完場前三分鐘給南韓追平，要加時定勝負，最後由南韓的安貞煥一頭頂入黃金入球，南韓爆冷以二比一獲勝，晉身八強。香港球迷支持意大利的較多，不過洪天明和黃家諾都支持南韓，南韓勝出兩人都十分高興。
洪天明的母親（洪金寶前妻）是南韓人，所以南韓勝出他特別開心，洪天明在電話中說：「我兩隊球隊都捧，意大利我不嬲都鍾意，而我係半個南韓人，所以當然都支持南韓，其實邊一隊球隊勝出我都開心。但係我冇睇到呢場波，因為當時我要開工，拍緊無綫嘅劇集《皆大歡喜》，雖然我好鍾意睇波同埋踢波，但係都應該以工作行先。」
洪天明接着最想看的，是明日的英巴大戰，他說：「呢個禮拜五我都要開工，睇吓到時就唔就到，英格蘭同巴西都係強隊，以技術嚟講，我覺得係巴西高啲嘅。」
而前晚黃家諾則被女友關之琳（之之）撇低，和一班朋友在蘭桂坊的酒吧睇波，賽事完畢後，黃家諾和朋友走到街上，與一班慶祝贏波的南韓人齊齊喝采，黃家諾亦跟着舉高雙手歡呼，十分興奮。
黃家諾說：「因為之之要開工，所以我同朋友睇波，我自己支持南韓，估中咗賽果二比一，之前我都一直有睇世界盃，總共估中咗八場。今晚南韓打得好好，場波好好睇，至於邊隊有冠軍相，咁就要睇巴西對英格蘭邊隊贏，邊隊贏就邊隊係冠軍。」
採訪：張止寒、楊潔雯
攝影：陳烱威