地產代理行趁樓市轉靜，索性搞活動等同事輕鬆吓，鴻運響禮拜二搞「618海上之旅」，田老闆請咗約100名過去兩個月業績優異嘅員工，去獅子星郵輪玩一晚，齊齊睇世界盃。
新地為加強商廈嘅租務成績，新設寫字樓租務總監一職，由彭禎生（JonathanPetit））坐呢個位，負責統籌新地中區國際金融中心，同機鐵九龍站第五至七期嘅租務事宜。呢位人兄來頭唔細，曾經響置地做到執行董事，專責寫字樓租務；又做過怡高物業顧問（現高力國際）亞太區行政總裁、重響仲量行（現仲量聯行）擔任聯席董事。
香港地產建設商會噚日舉行第20屆會董會第一次會議，信德何鴻燊連任會長，新地郭炳江任第一副會長，11個副會長包括長實李嘉誠、新世界鄭裕彤、恒基李兆基、合和胡應湘、信和黃廷方、鷹君羅嘉瑞、九倉吳光正、華懋龔如心、恒隆陳啟宗、太古簡基富同希慎利定昌，個個都係重量級人馬。
呢兩日世界盃冇賽事，發展商同代理即刻搞記者會，今日永泰亞洲安排睇九龍站漾日居第5座，而華懋深井傲庭峰就開放示範單位同公布開售詳情；利嘉閣則請睇九龍塘劍橋道11號B複式豪宅。
卓先測量師行話由裕泰興發展嘅南區曦園G室，啱啱以11萬租出；而山頂LaHacienda2樓就以9.7萬租出。中原潘志明透露，元朗西菁街好順泰大廈地下6個相連舖位，由投資者以1260萬購入。
蘭西