藍色「憂鬱」似乎襯晒今屆世界盃着呢件衫嘅球隊，事關着親藍衫（包括主場同作客顏色）嘅球隊，好似法國同意大利咁，都要喺今屆提早執包袱返屋企睇波。
以法國、意大利同阿根廷𠵱家嘅實力，無理由喺八強唔見佢哋。佢哋搞成咁，除咗因為有主力受傷影響實力同埋排錯陣之外，重可能因為佢哋係穿藍衫。雖然呢啲嘢好似冇乜科學根據，但真係唔到你唔信，事關晉身八強嘅球隊，冇一隊主場波衫係藍色。
好似英格蘭喺周五場波抽到主場，結果佢哋可以迫巴西着作客件藍色衫比賽，好似話咁樣令到球員直覺森巴雄師威力冇咁大喎。如果聽日真係俾英格蘭搞掂，睇嚟喺今屆世界盃，《藍色生死戀》就冇啦，「藍色大魔咒」就有一個。
安貞煥雖然做咗南韓嘅國家英雄，但可能就搞到自己失業。事關佢𠵱家效力嘅球會佩魯賈，講到明話唔要佢，費事惹麻煩喎。之但係，佢家陣經已係南韓英雄，下半世打跛腳都唔使憂啦；況且佢喺今屆世界盃打得唔錯，唔使驚冇班落啩！
意大利教練查柏東尼喺球隊輸畀南韓之後，表現得非常激動；除咗踢水樽同拳打後備席上嘅擋雨膠板之外，重猛咁鬧球證。但計我求大俠話，查柏東尼身為教練，應該畀啲風度，檢討自己隊波有乜嘢問題，會唔會自己都有責任，而唔係淨係識喊晒喺度發爛渣。
前巴西球王比利烏鴉口，貼邊隊邊隊就出局。記得佢老人家喺賽事未展開之前，話過意大利、法國、阿根廷同葡萄牙可以入四強，點知呢四隊全部八強不入，其中法、阿、葡更加係首圈出局。聽講佢最新貼巴西可以攞冠軍，唔知巴西球迷又有乜感覺呢？
係人都知美國總統喬治布殊唔鍾意英式足球，所以佢早排對於球隊喺首場分組賽，能夠爆冷贏葡萄牙三比二，都冇乜感覺同埋表示。不過話說日前佢喺華盛頓會見塞內加爾總統時，異口同聲希望大家一齊打入決賽；不過佢哋知唔知呢條大冷連贏有成六十七倍，證明冇人睇好，就算今屆世界盃冷門抬頭，都似乎唔會爆成咁啩？