恒指噚日大跌，好多人都話關美股事，周二美股收市後，蘋果電腦及AMD等發出盈利警告，美股期指急跌，拖累亞洲股市急挫，因此港股跌1.7%亦好正常。但趙飛雲則覺得，自從中華城市燃氣（603，前稱光通信）上周五復牌後急跌，港股氣氛明顯轉差，跌勢亦轉急，本周股仔火燒連環船嘅情況亦愈演愈烈，而且更禍及無辜，雖然噚日尾市有部份炒股龍頭見有「消防員」出嚟救火，但能否控制火勢及撲熄，仍有待觀察，理智嘅投資者自然唔會亂入火場尋寶。
港股6月急跌後，升勢已被破壞，恒指可能回復過去大半年10400至12000嘅大型橫行區走勢，趙飛雲調整戰略，改為在10400至10600附近部署買貨。技術上，恒指一旦跌穿10400大型橫行區，意味有機下試9000點，但除非大戶掌握到十分利淡嘅消息，否則機會很微。
早排提過7月尾至8月中有唔少窩輪到期，如果市勢繼續偏弱，發行商會按對沖比率減低持有正股，將令恒指跌勢加劇，這亦是近期部份大藍籌跌勢轉急原因之一。和黃（013）63元確認失守，反映繼續尋底，短期不宜憧憬，除非今明兩日能戲劇性抽回63元之上。
趙飛雲