林敏驄同陳伶俐兩公婆最近搬咗去清水灣半島，之前發展商同無綫合作過，所以無綫嘅藝人買有八折。不過馮仁昭同陳伶俐通過電話，佢話自己唔係買樓，只係租樓啫！佢話：「我之前住喺加州花園，今次搬嚟清水灣千幾呎嘅單位，因為呢度背山面水，風水好，而且我個仔林肯喺九龍區返學，出入方便啲，而我返無綫開工又近啲。」
問陳伶俐點解唔買樓？佢話：「因為風水師一直叫我唔好買樓，好彩之前聽風水師講冇買樓，加州花園都係租嘅，否則一定蝕晒啲錢，所以我𠵱家都唔會買樓住。遲啲仔仔返小學，我想搬去香港區住，嗰邊嘅學校好啲，𠵱家所有嘢，我哋都會以個仔行先。」
尹天照噚日返亞視為新劇《虎差》開會，佢同馮仁昭話患咗感冒病足三日，打咗兩支針都未見好，重傳染埋老婆㖭！在場嘅人即刻講笑話叫佢禁慾，同老婆分房瞓。
另外，尹天照最開心聽到新官陳永棋話亞視唔再買外購劇，佢話：「咁咪好，𠵱家咁多人跳樓，唔希望有藝員因為冇嘢做而跳樓啦！」
梁小冰日前喺廣州拍咗一個「舒適潔面寶」護膚品廣告。為咗唔想曬黑，不但放棄旅行計劃，重成個月唔出街㖭！而小冰要到下個月先幫亞視開戲，所以佢趁呢幾個月。悉心照顧中咗風嘅爸爸，重喺西貢租咗間屋，方便照顧爸爸。
由楊千嬅同陳奕迅主演嘅笑片《慳錢家族》，截至前日為止票房已經有成六百二十二萬，佢哋兩個都話大家合作得好開心，連寰宇老闆林小明都話下套戲要預埋千嬅一份。至於早前《慳》片以五十萬獎金搵慳錢好橋，結果總共收到二百幾條慳錢好橋，其中不乏抵死搞笑嘅慳錢方法，而佢哋更會將啲好橋拍《慳》片續集。
陳司翰日前去廣東拍旅遊特輯，佢話：「成個旅程最深刻就係可以親身登上軍用炮台，重可以試射實彈，真係好刺激。」原來佢係第一次拍旅遊特輯。陳司翰又買咗啲糭，打算送畀朋友做手信，佢話：「個樣就包得唔係咁好，成班人都唔係好想要，點知佢哋食完之後就讚我有好介紹。」
黎姿噚日喺電視城講開前排佢去賀契爺陳伯餐館開張，無故傳佢因為唔去章小蕙生日會，而同章小蕙唔妥。佢話：「我同佢唔係好熟，只係畀過啲二手衫佢賣，佢點諗冇所謂，但係就唔好拖我落水。」佢重話當日陳伯唔鍾意成班記者喺度，但係有人就堅持要帶記者，搞到陳伯唔開心！
吳啟華噚日喺電視城拍電視劇《黑夜彩虹》，馮仁昭聽到《黑》劇其中一個演員鄭嘉穎突然喺前日因高血壓要入院，問吳啟華知唔知道呢件事，佢話：「我都知道呢件事，監製添哥（李添勝）都同我提過，可能會重拍，但係我就唔希望換人。」吳啟華覺得鄭嘉穎係一個幾健康嘅人，重係網球健將，真係估唔到會血壓高，重要入埋醫院。
英皇旗下藝人好信陳伯，又鍾意去吸靈氣，之前有謝霆鋒，之後又有容祖兒，容祖兒話吸完靈氣個人可以精神爽利，所以佢都好想成日去吸，噚日Joey五點半落機，話自己喺北京返嚟，問佢係唔係去吸靈氣，點知佢就好搞笑咁扮到死死吓咁話：「邊有得吸靈氣，我係喺北京登台咋！」