大市跌開就跌，直情煞唔到車，恒指再創今次跌市新低，報10612，大跌240點，尾市有反彈，以10673收市，仍跌178點，成交則大增到92億元。大市急跌，市場氣氛極差，二三線股更出現「大屠殺」場面，跌幅超過1成的周街都係！
噚日港股之跌，好大程度係行在美股之前，跌定先！因為噚日亞洲時段美股杜指已大跌百多點，而標普期指亦跌咗17點，市場普遍預期周三美股大跌。蘋果電腦及超微盈警，話季度盈利會比預期為差；另外，又有一家大企業傳會出事，可能被當局調查。兩單消息對投資者信心都造成打擊。
上個禮拜一，本欄轉述咗一位大師嘅「預言」，佢話農曆5及6月呢兩個月，係今年最差嘅，港股會受突發事件影響，失驚無神咁大跌。農曆5月即係新曆6月11日開始，股市幾乎就跌足咁多日，其中只有1日反彈，亦只係升得19點，恒指由11288跌到噚日的10673，下跌615點，跌幅唔算大，但「預言期限」只係過咗幾日而已，而且對股仔而言，已經係大跌市，呢幾日唔見咗3至4成嘅，比比皆是。
大師咁靈，再索下佢嘅料，原來佢能夠在金融圈中享負盛名，主要就係佢講中舊年9月股市會大跌，當時嘅「預言」係股市會受到一種好震撼性嘅外來衝擊而急挫。之前，冇人會諗到出現恐怖襲擊，911之後先至恍然大悟。至於今次跌市，會跌到哪一個位，若有機會再索到料，立即第一時間轉告。
金威集團（910）走勢形成小雙頂，已於噚日跌穿頸線（0.5元）時暫時止賺，待其跌勢喘定，升浪再起時買番。噚日金威曾低見0.465元，剛好係50日線水平，初步有支持，但以小雙頂嘅量度跌幅計，有機會跌到0.45至0.43元。嚴守紀律，先避一避，日後部署買過，中長線仍看好，股價有機會在現水平翻一番。
郭兆誠